El combinao grupo del militar y policia ya aresta un persona y ya confisca mga enviao componente de facricacion de bombas na un coordinao operacion de interdiccion maritima na ciudad de Zamboanga, asegun con el Joint Task Force (JTF)-Poseidon del Martes.
Asegun con Rear Admiral Francisco Tagamolila, Jr., el comandante del JTF-Poseidon, el enviao componente de fabricacion de bombas ya confisca del Domingo denoche na aguas de mar del Barangay Rio Hondo, ciudad de Zamboanga.
Si Tagamolila ya habla, el combinao grupo del militar y policia ta conduci patrulla maritima cuando ya columbra sila un banca de motor, con un persona muntao, ta navega para na canto’y aplaya del Rio Hondo.
Si Tagamolila ya identifica lang con el arestao tripulante del banca de motor con si alias Moh, con quien ya cogi ta transporta 150 pedaso del detonador, 24 metros fusible de tiempo, y 87.5 kilos de nitrato de amonio.
Asegun con Tagamolila, el mga componente de explosivos intendido para usa na pescada explova, un ilegal manera y destructivo que severamente ta destrosa con el ecosistema marino.
Asegun con Tagamolila, con el arestao persona hunto con el mga confiscao componente de fabricacion de bombas ya entrega na custodia del 2nd Zamboanga City Mobile Force Company para mas investigacion. (B. Garcia)