El mga autoridad ya aresta un fugitivo na un operacion conjunta de aplicacion de ley na provincia del Lanao del Sur, asegun con el policia del Viernes.
Si Police Colonel Robert Daculan, el director del policia na provincia del Lanao del Sur, ya identifica con el arestao fugitivo como si Mape Mangogawan, quien ya escapa na quartel del policia na Sultan Mastura, Maguindanao del Norte.
Asegun con Daculan, con Mangogawan ya aresta mga alas 7:15 del Miercoles aga na Barangay Minimao, Kapatagan, Lanao del Sur.
Si Daculan ya habla, enseguidas el mga operativas ya conduci un operacion conjunta de aplicacion de ley despues que ya columbra y ya confirma el presencia de Mangogawan na Barangay Minimao, Kapatagan.
Nohay mas menciona si Daculan si cuando ya escapa si Mangogawan na quartel del policia del Sultan Mastura, Maguindanao del Norte y si cosa el de suyu caso.
Con Mangogawan ya pone bajo’l custodia del policia na Kapatagan, Lanao del Sur para el documentacion y propio disposicion. (B. Garcia)