El mga autoridad ya aresta con un chufer y ya confisca valor de P340,000 droga ilegal na un operacion contra droga na provincia del Zamboanga del Sur, asegun con el Philippine Drug Enforcement Agency (PDEA) del Sabado.
El PDEA-Zamboanga Peninsula ya identifica con el arestao suspechao como si alias Osama, 23 años el edad y residente del Barangay Bauyan, Sultan Naga Dimaporo, Lanao del Norte.
Asegun con el PDEA-Zamboanga Peninsula, con Osama ya aresta na un operacion de compra busto mga alas 12:15 del Martes denoche na Purok Mauswagon, Barangay Sto. Niño, Tukuran, Zamboanga del Sur.
Pero asegun con el PDEA, el cohorte de Osama, identificao como si alias Camad, 24 años el edad ya puede escapa.
Asegun con el PDEA, ya confisca na posesion de Osama mas o menos 50 gramos de suspechao shabu enpaquetao na un bolso plastico que tiene el valor de P340,000, un coche, un celpon, un balutan de papel como robar dinero, o boodle money, que ya pone insima un real P1,000 como markao dinero y un tarjeta de identificacion nacional.
Asegun con el PDEA-Zamboanga Peninsula, ya detene con Osama en preparacion del plantada del asunto contra conele por violacion del Ley Integral de Drogas Peligrosas del 2002. (B. Garcia)