Un miembro del Dawlah Islamiya-Hassan Group (DI-HG) el ya aresta el mga autoridad na un operacion de aplicacion de ley na provincia del Maguindanao del Sur, asegun con el policia del Miercoles.
El Police Regional Office-Bangsamoro Autonomous Region (PRO-BAR) nohay mas nombra con el arestao miembro del DI-HG puera lang de habla’r el arestao suspechao listao como el numero nueve persona mas buscada na Region 12.
Asegun con el PRO-BAR, con el acusao ya aresta na un operacion de aplicacion de ley por medio de implementacion de un orden de aresto del Lunes na Barangay Midpandacan, General Salipada K. Pendatun, Maguindanao del Sur.
El policia ya habla, el arestao miembro de DI-HG tiene pendiente orden de aresto por el crimen de cuatro cuentas de probao matansa que ya dale el un corte na Kabacan, Norte Cotabato del Deciembre 5, 2022.
Asegun con el policia, el corte ya recomenda el pago de P120,000 piansa cada un cuenta del asunto de progao matansa.
Asegun con el policia, el arestao miembro de DI-HG estaba tamen miembro del grupo de extorcion Al-khobar, quien responsable na actividad de extorcion y ponida de bomba apuntando mga negociantes y mga bus de pasajeros.
Asegun con el policia, con el arestao persona ya pone bajo’l custodia del Criminal Investigation and Detection Group. (B. Garcia)