El mga autoridad ya puede aresta con el suspechao de un incidente de tiroteo cuantos horas despues que ya socede el crimen na costa este del ciudad de Zamboanga, asegun con el policia del Martes.
El Zamboanga City Police Office (ZCPO) ya identifica con el arestao suspechao como si un tal Rodgin, 25 años el edad.
Asegun con el ZCPO, con Rodgin ya aresta na un operacion de seguimiento del Lunes aga na Barangay Cabaluay, 19 kilometros este del ciudad de Zamboanga.
Asegun con el ZCPO, si Rodgin amo el alegaomente ya tira con el victima, si Prince Romnick Bucoy Alejandro, 30 años el edad, mga alas 12:50 del Lunes aga na Purok 1, Barangay Cabluay.
Asegun con el ZCPO, base na informacion del un testigo cay si Alejandro ta man tomahan pati su mga uban cuando ya atraca el suspechao y ya tira con el victima.
Enseguidas ya lleva con Alejandro na hospital pero ya despidi el victima mientras bajo’l curada medical.
Asegun con el ZCPO, el arestao suspechao bajo ahora na custodia del Zamboanga City Police Station 3 (ZCPS3) en preparacion para el plantada del caso criminal contra con ele. (B. Garcia)