Total de P2.3 millon droga ilegal el ya confisca y dos personas el ya aresta mga autoridad na un campaña contra droga aqui na ciudad, asegun con el policia del Viernes.
Asegun con el mando del police regional, con el P2.3 millon ya confisca durante un “buy-bust operation” mga alas 8:05 del Jueves denoche na Purok 5, Barangay Calarian, en este ciudad.
El policia nohay nombra con el dos arestao suspechao puera lang cay compuesto sila de un mujer y hombre y man nana’y anak sila dos.
Asegun con el policia, ya puede confisca na posesion del dos arestao suspechao 350 gramos de suspechao shabu enpaquetao na siete supot-supot de plastic que tiene el valor de P2,380,000, un balutan del 59 pedaso de P1,000 “boodle money” que ya pone insima un verdadero P1,000 markao sen, un bolsa de hombro, un supot de plastic que ya usa como envase del confiscao shabu, y un coche.
Asegun con el policia, con el dos arestao suspechao ya pone bajo’l custodia del Zamboanga City Police Office en prepracion para el plantada del asunto contra canila por violacion del Comprehensive Dangerous Drugs Act of 2002. (B. Garcia, photo courtesy of Police Regional Office-9)