El gobierno local ya despelga 50 despachadores na mga lugar principal de convergencia del mga delegados del Zamboanga Peninsula Regional Athletic Association (ZPRAA) que ta conduci aqui na ciudad para evita mga instancias de sobra cobrada de pasaje el mga chufer de triciclo y taxi.
El ZPRAA para este año ya principia del ayer, Domningo, y hay termina na venedero Sabado, Abril 27.
El mga participantes del ZPRAA compuesto de 10,000 estudiantes-atletas y mga funcionarios tecnicos desde’l ocho delegaciones del diferentes parte del region.
Por medio del directiva del Alcalde John Dalipe, el Oficina del Administrador del Ciudad, ya inicia con el movimiento con el intencion para ayuda solve con el problema del mga pasajeros na manipulacion del precio o sobra cobrada de pasaje del mga chufer de triciclo y semehante transportacion.
El Abogao Wendell Sotto, el administrador de ciudad, ya habla cay especificamente el mga despachadores amo el encargao dale recivo y servi como mediador mientras el pasajero y chufer ta negocia si cuanto debe paga pasaje.
Asegun con Sotto, el pasajero y chufer, despues de escribi el mga necesario informacion na recivo, necesita conforma sila si cuanto el pasaje base na Ordinansa 416 del ciudad o el Fare Matrix Ordinance del ciudad.
Si Sotto ya habla, el mga despachadores designao na Joaquin F. Enriquez Memorial Sports Complex, centro commercial, lugar de accomodacion, lugar de juegos, aeropuerto, pantalan, terminal de autobus integrada, y otro para mga lugar de convergencia del mga visita del ZPRAA. (B. Garcia)
