El Zamboanga City Police Office (ZCPO) ya planta ya asunto de matansa contra con el dos personas quien responsable na matansa del Barrio Capitan Serbelio Molina de Cawit del Deciembre 1.
Si Coronel Alexander Lorenzo, el ZCPO director, ya nombra con el uno del dos como si Villamor Limpahan, 44 años el edad, pero nohay le nombra con el Segundo suspechao quien ta esta pa libre hasta ahora.
Asegun con Lorenzo el asunto de matansa ya somete sila del Lunes contra con el dos suspechao na oficina del fiscalia.
Asegun con Lorenzo, si Limpahan ya admiti ya cay sabe le sobre el plano para liquida con Molina, pero ya nega le cay talla le na lugar del crimen durante el matansa del oficial del barro de Cawit.
Del Deciembre 3, si Villamor personalmente ya aparece na Barangay Hall del San Roque hunto con cuantos del su parientes para clarifica cay hinde le envuelto na incidente de matansa de Molina, el barrio capitan del Cawit.
Sin embargo, asegun con Lorenzo, con el suspechao ya identifica positivamente cuando ya presenta conele con el mga testigos na matansa del Molina, poreso enseguidas conele ya aresta.
Con Molina fatalmente ya tira mga alas 7:15 del aga del Deciembre 1 na calle de Zone 4, Barangay Cawit, 13.35 kilometros oeste del ciudad.
Si Molina, 55 años el edad, ta maneja motorsiclo de camino para na barangay hall del Cawit cuando ya tira conele el uno del dos desonosidos armao persona muntao na otro motorsiclo que ya sigi na atras de victima.
Asegun con Lorenzo, ta continua de ila esfuerso para aresta con el otro suspechao na matansa del barrio capitan de Cawit. (B. Garcia)