El policia local ta apela con mga vivientes del ciudad para no asusta sobre el noticia na “social media” cay tiene del mga terorista envuelto na rebentada de bomba na “Mindanao Station University (MSU)-Marawi” el ya escapa para aqui na ciudad del Zamboanga.
Si Coronel Alexander Lorenzo, el Zamboanga City Police Office director, ya pidi con el publico para esta calma pero vigilante y deja conel policia investiga y verfica el veracidad del informacion.
Cuatro personas el ya muri y 45 otros el ya iri despues que ya rebenta un mafuersa bomba adentro del Dimaporo gymnasium del MSU-Marawi durante un misa de Catolico del Domingo aga.
Si Lorenzo ya apela con mga “bloggers” y otro personas ta usa con el social media para no pasa mga informacion sin propio verificacion cay ta causa este susto con el publico.
Asegun con Lorenzo, nohay amenaso na seguridad del ciudad desde con mga terorista y otro mal elementos del sociedad.
Si Lorenzo ya habla cay tiene sila y el otro sector de seguridad ya prepara contramedidas para el proteccion del vivientes del ciudad. (B. Garcia)