Cuatro rebelde New People’s Army (NPA), incluwido dos de ranggo, el ya rindi con mga tropa del fuersa militar na provincia del Maguindanao del Norte.
El Western Mindanao Command (Westmincom) ya nombra solamente con el mga rebelde NPA quien ya rindi como canda Ka Bugsay, Ka Sangkay, Ka Cesar y si Ka Jack, todo bajo el grupo del Far South Mindanao Region (FSMR) del NPA.
Asegun con el Westmincom cay si Ka Bugsay es un maestro de pulitica del Sub-Regional Committee Daguma del FSMR y si Ka Sangkay es un lider de escuadron del mismo grupo del rebelde NPA.
El Westmincom ya habla cay canda Ka Cesar y Ka Jack amo mga siguidores del Ka Sangkay.
Sila ya rindi con el mga tropa del 57th Infantry Battalion (IB) del Biyernes tarde na Barangay Mirab, Upi, Maguindanao del Norte.
Con el cuatro rebelde NPA que ya rindi ya presenta con Tiñente Coronel Guillermo Mabute, Jr., el comandante del 57IB.
El cuatro estaba rebelde NPA ya entraga dos riple M-14, un calibre .38 revolver, un improvised bomba, y mga cosas ta usa ase bomba y mga bala.
Asegun con el Westmincom cay con el cuatro rebelde NPA quien ya rindi ya pone bajo el custodiya del 57IB para el interogacion. (B. Garcia, photo courtesy of 57th Infantry Battalion)