El Alcalde John Dalipe ya dale premio de P100,000 cada uno con el tres del onse estacion de policia por el exitoso aresto del mga suspechao na cuatro incidentes de tiroteo en menos de un mes.
Si Dalipe ya entrega el premio na un simple cremonia del Lunes con el presencia de Police Colonel Kimberly Molitas, el interino director del Zamboanga City Police Office (ZCPO).
Con el premio de P100,000 cada uno ya recivi canda Police Lieutenant Colonel Hartzel Peter Billedo, el jefe de City Intelligence Unit; Police Major Xyrone Caronan, interino jefe de Zamboanga City Police Station 6 (ZCPS6); y si Police Major Ramon Aquiatan, Jr., el interino jefe del ZCPS7.
“Como parte del de aton continuando suporta, ta dale kita incentivo y premio con el mga estacion de policia por el de ila acomplicimiento,” si Dalipe ya habla.
Asegun con Dalipe, el premio hay servi como un motivacion para con el policia trabaja mas eficiente para el seguridad y proteccion del ciudad de Zamboanga.
Sin embargo, si Dalipe ya ordena con el ZCPO para identifica y aresta con el mga suspechao na dos incidentes de tiroteo que ya socede del Domingo.
Tres personas, incluido un mujer, el ya muri y otro dos el ya iri na dos separao incidentes de tiroteo que ya ocuri na Barangay Sta. Maria y Rio Hondo del Domingo na ciudad de Zamboanga. (B. Garcia)