El Oficina del Administrador del Ciudad ya recomenda el suspension o serrada del mercado nocturno na tiangge daan na Magay por causa del condiciones insalubre y sucio.
Este ya vene despues que el Abogao Wendel Sotto, el administrador del ciudad, bien desgustao cuando ya mira le bien calayatan el basura na mercado nocturno na Magay.
Asegun con Sotto, el calayatan basura ta dale lang mira cay nohay diciplina el mga dueño del tienda y mga hentes ta anda man compra.
“Ese limpiesa del taingge bajo man se na cargo del administrador del ciudad. Poreso ya recomenda kita suspende anay el operacion de ese mercado nocturno,” si Sotto ya habla.
Asegun con Sotto, ya hace le el recomendacion cay hinde ta mantene limpiesa el mga dueño del mga tienda na mercado nocturno.
Si Sotto ya habla, ya lleva ya le na atencion del Alcalde John Dalipe para el propio accion. (B. Garcia)