Total de 500 pacientes de tres lejanos barrios na municipio del Sergio Osmeña Sr., Zamboanga del Norte, el ya beneficia na servicio medical y dental ya conduci el militar.
Si Tiniente Coronel Jimmy Sanz, el comandante del 97th Infantry Battalion (IB), ya habla del Martes, el servicio medical y dental es parte del actividad na celebracion del aka-seis aniversario del 97IB del Domingo.
Asegun Sanz, el mga beneficiarios amo mga residentes del mga barrios de Bagumbayan, Nazareth, y San Antonio na municipio del Sergio Osmeña Sr.
Si Sanz ya habla, el mga beneficiarios ya recivi libre servicio medical y dental con libre medicina y vitamina, libre cortada pelo, kapa, tratamiento capilar, examin de asucar na sangre, y ponida de aretes.
Asegun con Sanz, ya distribui tamen sila 500 galon de agua, 800 paquetes de comida, chinelas, y paquetes de higiene dental.
El actividad ya conduci el 97IB con el suporta del 102nd Infantry Brigade, gobierno provincial del Zamboanga del Norte, grupo de doctor del 1st Infantry Division, mga oficiales del tres barrios, gobierno municipal del Sergio Osmeña, y mga grupo civico. (B. Garcia)
