El Alcalde John Dalipe hunto con el Congresista del Distrito Uno Khymer Olaso, antes Consejal Bong Atilano y Department of Public Works and Highways District Engineers ya encabesa con el groundbreaking ceremony del P95.4M Multi-Purpose Sports Facility na Joaquin Enriquez Memorial Sports Complex o conocido como el Grandstand del dia de Sabado. Asegun con el Alcalde Dalipe grande ayuda este proyekto para man man promote con el sports aqui na ciudad de Zamboanga que conosido como el “home of world class athletes.”
El pondo para na mencionao proyekto ya initia el govierno nacional por medio del Department of Public Works and Highways y este proyekto ya man request si Bong Atilano cuando consejal pa ele del ciudad del pasao año. Asegun con el City Sports Director Dr. Cecil Atilano cay el mencionao proyekto ay hace bajo na 3 phases que tiene total valor de tres cientos million de pesos. El facilidad ay man cater maga combative sports como el boxing, karatedo, taekwondo, muaythai, pencaksilat, wushu y 2 maga courts para del badminton.
(Cristine Falcasantos) (Photo Courtesy of Mayor John Dalipe Page)