Nueve personas envuelto na bendida y uso de droga ilegal el ya rindi na otoridad na municipio del Bongao, el cabesera de provincia del Tawi-Tawi.
Si Police Brigadier General Allan Nobleza, el director del pulisiya na rehyon otonomo, ya anuncia del Lunes cay el rindida del nueve personas envuelto na bendida y uso de droga ilegal es un resulta del campanya de informacion ya conduci na Sitio Kasulutan, Barangay Simandagit, Bongo, Tawi-Tawi.
Asegun con Nobleza el campanya de informacion nombrao como “Ama kong Pulis”, un proyecto local, ya conduci del Huwebes ya pasa el pulisiya del provincia del Tawi-Tawi en colaboracion con el Barangay Anti-Drug Abuse Council (BADAC), Barangay Peacekeeping Action Team (BPAT) y mga maestra y maestro.
Nohay nombra el pulisiya del Tawi-Tawi si quien el nueve personas ya rindi por rason de seguridad puera lang cay uno de ila ta bende y el ocho ta usa droga ilegal.
Asegun con el pulisiya del Tawi-Tawi cay el Sitio Kasulutan na Barangay Simandagit conosido como un lugar donde mucho ta esta mga hente envuelto na actividades de droga ilegal.
Asegun con Nobleza cay el pulisiya y BADAC ta implementa con el proyecto de Ama kong Pulis para dale el coraje con mga hente envuelto na actividades de droga ilegal para rindo na otoridad.
Si Nobleza ya habla cay con aquellos quien ya rindi ya incluwi canila na lista del BADAC y ya lleva canila para na oficina de Provincial Drug Enforcement Unit para el interrogacion.
Con el nueve personalidad ya entrega na BADAC del Simandagit y ya pone bajo na “Bagong Buhay Kasulutan”, un programa de reformacion en colaboracion con el pulisiya para educa canila de moralidad, valores, y spiritualidad y para rindi otro servicio comunidad.
Ya comenda si Nobleza con el pulisiya de Tawi-Tawi por el de ila acomplisimiento y ta apela le con el publico para suporta con el esfuerso del govierno particularmente na peleya contra droga ilegal y criminalidad.
Ya apela tamen si Nobleza con el publico para reporta na otoridad mga actividades ilegal aue ta susede na de ila cada’y cual comunidad. (B. Garcia, photo courtesy of (Police Regional Office-Bangsamoro Autonomous Region)