Un persona el ya aresta y P340,000 cantidad suspechao shabu y pusil el ya confisca el combinao operativas del pulisiya y Philippine Drug Enforcement Agency na un campanya contra droga ilegal na provincia del Zamboanga del Sur.
Si Police Lieutenant Colonel Helen Galvez, el portavoz del pulisiya rehyonal, ya habla cay con el arestao suspechao ya conose como so Jaid Dacula Danial, 35 años el edad.
Asegun con Galvez con Danial ya aresta na un “buy-bust operation” mga alas 6:50 del Sabado aga na Purok Kalimudan, Barangay Poblacion, Lapuyan, Zamboanga del Sur.
Asegun con Galvez ya puede confisca na posesion de Danial 50 gramos de suspechao shabu con el valor de P340,000, un calibre .45 pistola con mga bala, un bundle de “boodle money” que ya pone insima in verdadero P1,000 como marcao sen y mga cosa na uso de droga ilegal.
Con el arestao suspechao y mga confiscao evidencia ya pone bajo na custodiya del PDEA na Zamboanga del Sur.
Si Police Brigadier General Neil Alinsañgan, el director rehyonal del pulisiya, ya comenda con el mga pulis y agente del PDEA por el de ila buen acomplisimiento. (B. Garcia, photo courtesy of Police Regional Office-9)