Exitosamente ya recubri mga armas de fuego el mga soldao cuando ya puede sila previni un tirahan entre dos grupo de mga armao personas na provincia del Maguindanao del Sur, asegun con el militar del Lunes.
Asegun con el 6th Infantry Battalion (6IB), con el dos grupo ya previni man tirahan mga alas 6 del Sabado aga na Barangay Ganta, Shariff Saydona Mustapha, Maguindanao del Sur.
Asegun con el 6IB, con el tirahan entre el armao grupo de Badrudin Dagandal y un tal Bendao ya puede previni cuando ya responde el mga soldao con un informacion cay ta prepara el dos grupo para man guerra.
Asegun con el 6IB, el mga armao siguidores de Dagandal y Bendao ya man atras cuando ya columbra sila con el mga soldao que nuevo ya llega na Barangay Ganta.
Durante el conducida del operacion de limpieza, el mga soldao ya recubri dos rifles Garand que ya converti para na rifle M14, un granda, y tres bandoller.
Si Brigadier General Edgar Catu, el comandante del 601st Infantry Brigade ya alerta con mga soldao quien tiene jurisdiccion na lugar del incidente para hace enbuscada con el dos armao grupo. (B. Garcia)