Total de 67 antes miembros del grupo Abu Sayyaf y 30 viudas el esperansao beneficia na programa de reintegration del gobierno, asegun con el militar del Sabado.
El programa de reintegracion es un esfuerzo colaborativo entre el Ministerio de Orden Publico y Seguridad, o MPOS-Sulu, y del 1102nd Infantry “Ganarul” Brigade (1102Bde) base na municipio del Luuk, Sulu.
Del Jueves, ya conduci un final conferencia de coordinacion na cuartel del 1102Bde na Barangay Tandu Bato, Luuk, Sulu, con el intento suporta con el reintegracion del mga antes miembros del Abu Sayyaf para na sociedad principal.
Con el conferencia ya atende mga alto funccionarios incluido si Al-Shamier Aminulla, el coordinador del MPOS na Sulu, y personajes desde’l 1102Bde y su subordinado bataliones.
El conferencia ya marka un significante mojon na esfuerzos del gobierno para atende con el causa principal del conflicto y promociona sostenible paz na region, asegun con el 1102Bde. (B. Garcia)