Zamboanga: 64IB tiene nuevo comandante

0
10

El 101st Infantry Brigade ya inicia cambio na liderato del 64th Infantry Battalion (IB) base na Barangay Tumahubong, municipio del Sumisip, provincia de Basilan.

El nuevo comandante del 64IB amo si Tiniente Coronel Abel Potutan quien ya releva con Tiniente Coronel John Ferdinand Lazo, con quien ya designa para na otro puesto.

Si Brigadier General Alvin Luzon, el comandante del 101st Infantry Brigade, ya encabesa con el ceremonya del cambio del mando que ya conduci na quartel del 64IB na Tumahubong, Sumisip, del Miyercoles.

Asegun con Luzon cay el sabiduria, abilidad, y experiencia amo ya sirvi como base na escujida con Putotan para sinta como el nuevo comandante del 64IB.

Ya comenda si Luzon con Lazo por su dedicacion y buen trabajo durante su turno como el comandante del mencionao batalion.

Ya jura si Putotan para ase le todo’l manera para puede acomplisi con el mission del 64IB, particularmente na mantencion de paz y orden. (B. Garcia, photo courtesy of 101st Infantry Brigade)

Leave a Reply