El mga personajes del Guardia Costal del Pilipinas (PCG) ya salva con 13 personas abordo na un lancha que ya man aberiya el makina na medianiya del mar del provincial de Basilan.
Asegun con el estacion del guardia costal na Basilan, con el lancha nombrao como el M/V SR Express ya puede salva mga alas 12 del Huwebes madrogada na vicinidad de 10 millas nauticas desde’l isla de Dasalan na municipio del Hadji Muhtamad na provincia de Basilan.
Asegun con el PCG cay ocho del 13 personas muntao na M/V SR Express amo mga pasajeros y el restanto sinco mga tripulantes.
Base na investigacion, el M/V SR Express ta navega desde’l ciudad de Zamboanga para na municipio del Pangutaran na Sulu cuando ya man aberiya el makina del lancha myentras na vicinidad del island de Dasalan.
El subestacion del guardia costal na Hadji Muhtamad enseguidas ya responde con el llamada de ausilio, y ya puede encontra con el lancha ta man anud na mar despues de un hora enbuscada.
Asegun con el PCG, ya hila con el M/V SR Express el guardia costal, en coordinacion con el govierno del municipio del Hadji Muhtamad, para na Barangay Tausan del mencionao lugar.
Con el mga tripulantes y pasajeros ya pone bajo el atencion medical myentras ta compone con el makina del lancha. (B. Garcia, photo courtesy of CGDSWM)