Seis personas, incluido un consejal de un municipio, el ya iri na un incidente de emboscada na provincia del Basilan, asegun con el policia del Sabado.
Asegun con el policia, el incidente de emboscada ya ocuri pasada alas 6 del aga, este dia de Sabado, na Sitio Lessem, Barangay Upper Bato-Bato, Akbar, Basilan.
El policia ya identifica con el mga victimas como canda Ryan Seyong Latip, Abubakar Alih Latip, Jemar Kalang, Husin Latip Kalang, un consejal na municipio de Tuburan, Ajim Jamaluddin, y si Algafar Naser.
Asegun con el policia, todo’l mga victimas mga residentes del municipio de Tuburan.
Asegun con el policia, con el mga suspechao ya conoce como mga siguidores del grupo de un tal Jemar y un tal Kidyok.
El policia ta cre cay playto entre man familia el motivo del incidente.
Base na investigacion, el mga victimas abordo na un vehiculo y de camino para na Sitio Lessem, Barangay Upper Bato Bato, Akbar estaba na municipio de Tuburan, cuando ya tira canila el mga suspechao.
Maskin irido, el mga victimas ya puede tira y imbisti con el mga suspechao y ya man atras desde’l lugar del emboscada.
Con el mga victimas ya lleva de ila mga familia na hospital na ciudad de Lamitan, Basilan para el curada medical.
Mientras tanto, el policia na municpio del Akbar que ta encabesa si Police Major Ayap Sali ya transporta con el mga victimas para na ciudad de Zamboanga para el mas curada medical. (B. Garcia)