Dos miembros del Bangsamoro Islamic Freedom Fighters (BIFF) el ya rindi na autoridad na provincia del Maguindanao del Sur, asegun con el militar del Sabado.
Si Tiniente Coronel Udgie Villan, el comandante del 33rd Infantry Battalion (IB), ya presenta con el dos rendidores BIFF del Viernes con mga oficiales del municipio de Shariff Aguak y Shariff Saydona Mustapha na provincia del Maguindanao del Sur.
El presentacion ya hace na quartel del 33IB na Barangay Zapakan, Radja Buayan, Maguindanao del Sur.
Si Villan nohay mas identifica con el dos rendidores BIFF quien mga siguidores del BIFF faccion de Karialan y BIFF faccion de Bungos.
Asegun con Villan, el dos rendidores BIFF ya entrega de ila mga materiales de guerra compuesto de un Rocket Launcher, Rocket Propelled Grenade, un calibre .45 pistola, y un 9-mm submachinegun.
Si Brigadier General Oriel Pangcog, el comandante del 601st Infantry Brigade, ya servi de testigo durante el evento de presentacion del dos rendidores BIFF con mga oficiales del municipio de Sharrif Aguak y Sharrif Saydona Mustapha.
Si Pangcog ya comenda con el buen coordinacion entre el gobierno local desde barangay para na municipo y del militar.
Ademas, con agradecimiento ya reconoce si Pangcog con el decision del dos rendidores BIFF como un positivo paso para fomenta paz na comunidad y ya apela canila para inspira con el de ila antes compañeros para sigi y vive en paz.
Asegun con Pangcog, hay coordina sila con el mga agencias na region autonomo para dale canila ayuda busca lavida para mejora del ila condicion de estar.
Durante el evento, el dos rendidores ya recivi un saco de arroz de 25 kilos y ayuda financial cada uno desde con el gobierno del municipio del Shariff Aguak y Shariff Saydona Mustapha, Maguindanao Del Sur. (B. Garcia)