Seis personas el ya aresta y mas the P4 millon valor de droga el ya confisca na un campaña contra droga ilegal na provincia del Lanao del Sur, asegun con el policia del Domingo.
Si Coronel Robert Daculan, el director del policia na Lanao del Sur, ya habla cay con el mga suspechao ya aresta y droga ilegal ya confisca na un “buy-bust operation” mga 3:30 del Sabado tarde na Barangay Biaba Damag, ciudad de Marawi
Si Daculan nohay mas nombra con el mga arestao suspechao quien compuesto de tres hombre y tres mujer.
Asegun con Daculan, ya puede confisca na posesion del mga suspechao 600 gramos suspechao shabu con el valor de P4,080,000, un coche, dos verdadero P1,000 ya usa como markao sen y ya pone insima y abajo del un balutan de P300,000 “boodle money”, un bolsa-bolsa, dos celpon, y cuatro tarjetas de identificacion.
Si Brigadier General Allan Nobleza, el director del Police Regional Office-Bangsamoro Autonomous Region, ya comenda con el mga operativas por el de ila acomplisimiento.
El mga arestao suspechao y mga evidencia ya pone bajo’l custodia del quartel del policia na ciudad de Marawi en preparacion para el plantada del asunto contra canila. (B. Garcia, photo courtesy of PRO-BAR)