El 53rd Infantry Battalion (IB) y el Municipal Task Force to End Local Communist Armed Conflict (MTF-ELCAC) ya ase hatud con el resto del rebelde New People’s Army (NPA) na su familya na San Miguel, Zamboanga del Sur.
El 53IB ya anuncia del Domingo cay con el resto de Edwin Gulane ya ase hatud el mga soldao na casa del su familya na Barangay San Isidro, San Miguel denoche del Agosto 9.
Asegun con el 53IB con el resto de Gulane ya abandona su mga compañeros rebelde NPA despues que ya muri le durante el tirahan contra con mga soldao aga del Agosto 9 na Barangay New Rizal, Sergio Osmeña, Zamboanga del Norte.
El tirahan ya ocuri despues que el mga soldao ya verifica el informacion sobre el presencia del mga armao personas na Barangay New Rizal.
Asegun con Brigadier General Elmer Suderio, el comandante del 102nd Infantry Brigade, el mga tropa ya ase todo’l esfuerso para ase hatud con el resto de Gulane na su casa como un respeto del su derechas humanos y ley internacional de humanitario.
Si Suderio ya rindi su gratitud con el San Miguel MTF-ELCAC que ta encabesa el alcalde Ex Ocapan por el suporta para dale decente intiero con el defunto Gulane.
Na mismo tiempo, ta ase llamada si Suderio con el mga restante rebelde NPA para rindi y toma ventaja con el programa del govierno que ta ofrese con mga antes rebelde. (B. Garcia, photo courtesy of 53rd Infantry Battalion)