Zamboanga: 2 miembros del BIFF ya rendi na militar

0
9
Photo courtesy of Westmincom PIO

Dos miembros del Bangsamoro Islamic Freedom Fighters (BIFF) el ya rendi na autoridad amediante el ofensiva del gobierno contra canila na provincia del Maguindanao del Sur, asegun con el militar del Lunes.

Asegun con el Western Mindanao Command (Westmincom), el dos miembros del BIFF ya rendi con el mga personajes del 6th Mechanized Infantry Battalion del Viernes na borde del mga municipios de Datu Saudi Ampatuan y Datu Salibo na provincia del Maguindanao del Sur.

El Westmincom nohay nombra con el dos rendidores pero asegun, mga siguidores sila del faccion de Bungos del BIFF.

Asegun con el Westmincom, el dos BIFF ya somete de ila cuerpo con el mga soldao quien ta conduci sin descanso ofensiva na borde del Datu Saudi Ampatuan y Datu Salibo.

Si Tiniente General William Gonzales, el comandante del Westmincom, ya comenda con el mga tropa del 6th Infantry Mechanized Battalion for el existoso rendida del dos mga antes violente extremistas.

β€œTa recivi came com el mga rendidores quien ya decidi bira cara desde’l violencia y ya escuji vivi un pacifico vida,” si Gonzales ya habla.

β€œTa asegura yo cay hay dale canila el oportunidad para provecha con el iniciativo de paz del gobierno que hay ayuda na de ila reintegracion na sociedad,” ya habla si Gonzales.

El dos rendidores BIFF ya entrega na mga autoridad un rifle Garand y Ultimax con mga bala. (B. Garcia)

Leave a Reply