El mga oficiales del gobierno local ya rendi sinco armas de fuego de alta calibre con el autoridad na provincia del Maguindanao del Sur, asegun con el militar del Jueves.
Aegun con el Western Mindanao Command (Westmincom), con el mga armas de fuego ya rendi del Lunes mga oficiales del muncipio del Datu Paglas, Maguindanao del Sur.
Asegun con el Westmincom, el rendida del mga pusil es resulta del continuando campaña del Joint Task Force (JTF)-Central contra con el proliferacion del mga armas de fuego sin licensia.
El Alcalde Abubakar Paglas del municipio de Paglas el ya encabesa con el rendida del mga armas de fuego durante un ceremonia que ya hace na nuevo centro de entreno na complexo municipal del Datu Paglas, Maguindanao del Sur.
El mga armas de fuego que ya rendi ta inclui un rifle carbin, dos calibre .50 rifle de francotirador, y dos M-79 lanzagranadas con un bala.
Si Coronel Ronel Manalo, el deputy commander del 1st Mechanized Infantry Brigade, formalmente ya recivi con el mga armas de fuego na presencia del mga alto oficiales del militar, policia, y de barangay.
Si Tiniente General William Gonzales, el comandante del Westmincom, ya comenda con el tropa del JTF-Central por el de ila intensificao esfuerzo para limpia con el Central Mindanao de mga pusil sin licensia.
Con el mga rendido armas de fuego ya pone bajo’l temporario custodia del 1st Mechanized Infantry Battalion y hay entrega despues para na 12th Forward Service Support Unit the Army para el propio disposicion. (B. Garcia)