Zamboanga: 3 arestao, mas de P300,000 droga ya confisca

0
4
(Photo courtesy of Police Regional Office Bangsamoro Autonomous Region)

El lijero respondida del mga pulis ya resulta na aresto de tres personas y confiscacion de mas de P300,000 valor de droga ilegal na provincia de Basilan, asegun con el policia del Jueves.

Asegun con el Police Regional Office-Bangsamoro Autonomous Region (PRO-BAR), con el tres suspechao ya aresta mga alas 4:15 del Martes tarde na Sitio Bohe Patenggaan, Barangay Kuhon, Al-Barka, Basilan.

El PRO-BAR nohay mas nombra con el tres arestao suspechao con quien ya cogi na acto ta vende y usa droga ilegal.

Asegun con el PRO-BAR, el aresto del tres suspechao ya vene despues que ya reporta el un concierne residente na policia aserca el transaccion de droga ilegal que ta socede na Sitio Bohe Pantenggaan, Barangay Kuhon, Al-Barka.

El policia ya confisca na posesion del tres suspechao 44.21 gramos de shabu que tiene el valor de P300,648.40, un diutay bolsa, P2,600 dinero, y mga parafernales de droga ilegal.

Asegun con el PRO-BAR, con el tres arestao suspechao ya pone bajo’l custodia del policia na municipio del Al-Barka en preparacion para el plantada del asunto contra canila por violacion del Ley Integral de Drogas Peligrosas de 2002. (B. Garcia)

Leave a Reply