Sinco personas el ya iri mientras un official de barangay el ya libra na un incidente de tiroteo na Bangsamoro Autonomous Region in Muslim Mindanao (BARMM), asegun con el policia del Domingo.
Asegun con el Police Regional Office-Bangsamoro Autonomous Region (PRO-BAR), el incidente ya ocuri del Viernes denoche na Calle Mabini, Barangay Bagua 3, ciudad de Cotabato.
El policia nohay mas identifica con el sinco victima quien mga parientes de Datu Edris Ayunan Pasawiran, el Barrio Capitan del Kalanganan 2, ciudad de Cotabato.
Asegun con el policia, nohay pasa nada con Pasawiran durante el incidente. Con el mga irido victima ya lleva na Cotabato Regional Medical Center para el tratamiento medical.
Base na investigacion del policia, si Pasawiran y el mga victima abordo na un vehiculo cuando ya tira canila el mga desconcidos armao personas muntao na otro vehiculo que ya atraca serca canila y despues ya corre.
El policia ya recubri mga capsula de calibre .45 pistola y de rifle M-16 na lugar del crimen.
Asegun con el policia, con el vehiculo del mga suspechao ya recubri na Barangay Rosary Heights 3, ciudad de Cotabato.
El policia na ciudad de Cotabato ta continua de ila investigacion para establisa el identificacion y aresta con el mga suspechao. (B. Garcia)