Un rebelde New People’s Army (NPA) el ya muri na tirahan contra con mga soldao na provincia del Sultan Kudarat, asegun con el militar del Domingo.
Asegun con el 6th Infantry Division (ID), el tirahan ya socede mga alas 4:30 del Sabado aga na Barangay Kiadsam, municipio del Senator Ninoy Aquino, provincia de Sultan Kudarat.
Asegun con el 6ID, el tirahan ya socede cuando ya conduci operacion militar el mga personajes del 7th Infantry Battalion (IB) despues que ya recivi sila informacion cay ta conduci actividad de extorcion el un grupo de rebelde NPA que ta encabesa si Eusibio Cranzo na Barangay Kiadsam, Senator Ninoy Aquino.
Asegun con el 6ID, el tirahan ya alcansa dentro de cuatro minutos hasta ya man atras del mga rebelde NPA para na direccion del Sitio Kiluding, Barangay Kiadsam.
El mga tropas del 7IB ya recubri con el cadaver del muerto NPA y un rifle Garand na lugar de tirahan.
Asegun con el 6ID, ta precura pa determina el mga tropas del 7IB si cosa el identificacion del muerto rebelde NPA.
Mientras tanto, si Brigadier General Michael Santos, el comandante del 603rd Infantry Brigade, ya ordena con su mga personajes para ase enbuscada con el mga rebelde NPA quien ya man atras na tirahan y ya escapa. (B. Garcia)