Total de 449 mga “Persons Deprived of Liberty (PDL) el ya vota este dia na “Barangay and Sangguniang Kabataan Elections (BSKE) 2023.
Na total de 449 votantes, 428 de ila el mga hombre y el restante 21 mga mujeres.
El votacion ya principia mga alas 7:27 del aga y ya termina mga alas 10:10 del aga.
Asegun con el anuncio del Zamboanga City Jail (ZCJ), el eleccion ya conduci na covered court del ZCJ bajo el supervision del mga oficiales y personajes del Commission on Human Rights, Parish Pastoral Council for Responsible Voting y del Provincial Jail Administrators Office.
Asegun con el ZCJ, 134 personajes del Bureau of Jail Management and Penology el ya guardia para asegura cay pacifico y de orden el conducida del eleccion adentro na ZCJ.
“Alegre came anuncia cay pacifico y de orden el conducida del BSKE na ZCJ,” si Superintendent Xavier Solda ya habla.
“Un importante actividad este BSKE para uwi y reconose con el de amon mga PDL,” si Solda ya habla. (News & photo courtesy by Bong Garcia Jr.)