Siete victima de trafico humano (human trafficking) el ya puede salva mga personajes del fuersa naval en coordinacion con otro agencias del govierno na provincia de Tawi-Tawi.
Asegun con Rear Admiral Donn Anthony Miraflor, el comandante del Naval Forces Western Mindanao (NFWM), cay con el siete victima ya salva apenas ya pundia el varco de pasajero que ta munta sila na pantalan na Barangay Poblacion, Bongao, Tawi-Tawi.
Asegun con Miraflor cay el mga victima, compuesto de tres hombra y cuatro mujer, mga residentes del Zamboanga Peninsula y de camino para na Malaysia sin mga propio documentos.
Si Miraflor ya habla cay con el siete victima ya ordena para anda na Bongao, Tawi-Tawi, donde tiene quien ay encontra canila y lleva para na Sabah.
El momento ay llega sila na de ila destinacion, ay dale canila trabajo el un tal “Ninos Juli” y “Mah Vui Kung”, quien base na Pelda Semporna, Sabah.
Asegun con Miraflor con el mga salvao victima de trafico humano ya entrega na custodiya del “Local Committees on Anti-Trafficking and Violence Against Women and Children (LCAT-VAWC)” del “Municipal Inter-Agency Council Against Trafficking (MIACAT)” na Tawi-Tawi.
Con el mga salvao victima ay entrega despues para na custodiya del Ministry of Social Welfare and Development Office, donde ay dale canila el propio consejo antes ay ase canila hatud para bolbe na de ila cada’y cual lugar. (B. Garcia, photo courtesy of NFWM)