Cuatro pulis, incluido un oficial, quien alegaomente envuelto na P2.1 millon robo recientemente, el ya aresta mga autoridad na separo “follow-up operations” aqui na ciudad, asegun con un alto oficial del policia local del Domingo.
Otro uno suspechao, quien antes un pulis, ya rindi na policia na Alicia, Zamboanga Sibugay.
Si Police Colonel Alexander Lorenzo, el Zamboanga City Police Office director, ya nombra con el mga arestao pulis como el siguientes: Patrolman Rayan Apostol, 31; Police Lieutenant Ariel Jolatoria, 43; Police Senior Master Sergeant Alnajer Ynawat, 41; y si Police Staff Sergeant Edcel Nicolas, 42.
El otro suspechao quien ya rindi na Alicia, Zamboanga Sibugay ya nombra si Lorenzo como si Bobby Judan, un antes miembro del policia.
Si Lorenzo ya habla cay si Apostol designao na 2nd Zamboanga City Mobile Force Company; si Jolatoria na Regional Headquarters Support Unit; si Ynawat na City Mobile Patrol Unit; y si Nicolas na Zamboanga City Police Station 7.
Asegun con Lorenzo, ya puede establisa si quien el mga suspechao na robo base na “video” del “getaway” vehiculo de ila que ya puede saca por medio de Closed Circuit Television (CCTV) durante el incidente.
“El vehichulo ya usa mga suspechao un rent-a-car,” ya habla si Lorenzo.
El mga arestao suspechao amo alegaomente envuelto na robo de P2.1 millon na casa del negociante Al-Ghabid Abdul, na Barangay Tetuan, aqui na ciudad del Noviembre 14.
Asegun con el policia de mas temprano, cuando ya entra el mga suspechao na casa del negociante, ya introduci sila como mga miembros del policia y sirvi sila orden de aresto con Abdurajik Abdul, el tata del victima.
Envez de sirvi orden de aresto, dos del suspechao ya subi na segundo piso del casa y ya saca P200,000 na drawer.
Asegun con el policia, ya saca tamem mga suspechao dos caja de yero que ta contene total de P1.9 million.
Con el dos caja de yero ya encontra na Barangay San Roque un dia despues del incidente. Todo el caja de yero destrosa ya y nohay mas laman. (B. Garcia)