Cuatro personas el ya aresta na un operacion de compra busto que ya resulta na bungcada de un cuarto de droga na ciudad de Zamboanga, asegun con el Philippine Drug Enforcement Agency (PDEA) del Jueves.
El oficina regional del PDEA, ya identifica con el mga arestao suspechao como el mga siguientes: Girlie May Pasaforte, 36, el mantenedor del cuarto de droga; Ayang Amping, 20; Bryanjay Anastacio, 23; y si Jay-R Guevarra, 22, todo mga visita del cuarto de droga.
Asegun con Maharani Gadaoni-Tosoc, el director regional del PDEA, con el cuatro suspechao ya aresta na un operacion de compra busto que ya resulta na bungcada del cuarto de droga mga alas 9:50 del Martes denoche na Purok 8, Sitio Barigon, Barangay Tugbungan, ciudad de Zamboanga.
Asegun con Gadaoni-Tosoc, ya confisca durante el operacion de compra busto 10 gramos de suspechao shabu que tiene el valor de P68,000, dos termosallada transparente sobrecitos plastico tiene rastro de shabu, P500 markao dinero, un caja de cigarillo y mucho mga parafernales de droga ilegal.
Si Gadaoni-Tosoc ya habla, hay planta caso contra con el mga suspechao por violacion del Secciones 5, 6, 7, 13 y 14, Articulo II del Ley de Republica 9165 o mas conocido como el Ley Integral de Drogas Pelogrosas de 2002. (B. Garcia) (Photo Courtesy of PDEA-9)