Total de 312 indigente familias na Barangay Lanzones, en este ciudad, el ya beneficia na caravana de salud que ya inicia el “Philippine Red Cross (PRC)-Zamboanga City Chapter” en asociacion con el Oficina de Salud del Ciudad y otro agencias con el suporta de “Australian Aid (AusAid)”.
El caravana de salud ya conduci del Sabado. El mga servicio que ya rindi ta inclui el consultacion con libre medicina, servicio dental, libre cortada de pelo, primero ayuda y lectura-demostracion y promocion del salud y hygiene.
Asegun con el Oficina de Salud del Ciudad, ya dale tamen libre arroz caldo, vitamina, y suplemento.
Si Jose Rosellier Atilano, el barrio capitan del Lanzones, ya expresa su gratitud con el mga organizadores por el ayuda que ya dale sila con el mga residentes del barangay quien necesitao mucho servicio de salud.
El caravana es parte del continuando esfuerzo del PRC-Zamboanga Chapter, Oficina de Salud del Ciudad y otro agencia con el suporta del AusAid para proporciona esencial servicio de salud con mga marginalizao y vulnerable sector ng mga lejanos comunidad del ciudad. (B. Garcia)