Maga personajes del guardia costal designao como maga sea marshals ya puede salva con tres victima de trafficking-in-persons abordo na un varco de pasajero ta viaja para na provincia de Tawi-Tawi.
Asegun con el guardia costal cay con el maga victima ya puede salva del Domingo aga cuando ya gole maga sea marshals aserca el presencia na varco del tres victima quien estaba pa na provincial de Zamboanga del Sur.
El guardia costal nohay publica el maga nombre del tres victima quien compuesto de un hombre treynta’y siete años, un mujer cuarenta’y cuatro años y un bata homdre nueve años el edad.
Durante el entrevista, ya habla el tres victima cay ya dale canila instruccion el un grupo de maga hente para viaja para na provincia de Tawi-Tawi y despues para na Sabah y tiene lang canila quien ay anda encontra na de ila llegada.
El maga sea matshals, hunto con el representante del Municipal Interagency Committee Against Trafficking (MIACAT) ya entrega con el tres victima na pulisiya del Tawi-Tawi para el propio disposision.
El tres victima ya esta na quartel del pulisiya de Bongao donde ay espera sila el viaje del varco para bolbe sila na de ila lugar na Zamboanga del Sur. (Bong Garcia, Jr.)
(Photo Courtesy of Philippine Coast Guard)