Tres mga senior scouts el ya muri mientras 10 otro el ya guinda na hospital despues que ya man calambre sila del Jueves na sitio de campamento del Boy Scout of the Philippines (BSP) na Monte de Abong-Abong, Barangay Pasonanca, ciudad de City.
Asegun con el Abogao Jose Rizalino Ortega, el presidente del consejo de BSP na ciudad de Zamboanga, ya man calambre el mga senior scouts cuando el punta del pabellon, que ta transferi sila para na otro lugar, accidentalmente ya tupa na alambre de electricidad.
Asegun con Ortega, el incidente ya ocuri cuantos minutos antes hay principia el Jamboree para este año na ciudad donde uno del mga actividades amo el juegos para del mga Kid y Cub Scouts.
“El pabellon entendido dale sombra con el mga bata na lugar donde sila hay juga,” si Ortega ya habla.
Sin embargo, si Ortega ya enfatiza cay el mga Kid y Cub Scouts quien mga Kindergarten y Grade 1 hasta 3 estudiantes hinde ta esta na campamento del jamboree.
Asegun con Ortega, ta anda lang sila na sitio de campamento si tiene sila actividad.
Si Dr. Shadrina Sarapuddin, el portavoz del Zamboanga City Medical Center, ya habla cay el doctor ya declara muerto con el tres fatalidad apenas sila ya llega na hospital.
El mga fatalidad todo mga senior scouts que tiene el edad de 22, 18, y 17 quien mga residentes Barangays Sta. Catalina, Pasonanca, y Tetuan, respetivamente.
Asegun con Sarapuddin, el otro 10 victima de calambre na estable condicion ya y ya pone canila bajo na mas del observacion. (B. Garcia)