El mga autoridad ya confisca mas de P1 millon valor de cigarillo y ya aresta un negociante na un operacion de aplicacion de ley na provincia del Zamboanga del Norte, asegun con el policia del Jueves.
Si Brigadier General Bowenn Joey Masauding, el director del mando regional del policia, ya identifica con el arestao negociante como si Edgardo Garao.
Asegun con Masauding, con Garao ya aresta del Miercoles na Purok 3, Barangay New Lebangon, Polanco, Zamboanga del Norte.
“Ya aresta conele na acto ta bende cigarillo en violacion del Ley de Republica Numero 10643, conocido como el Graphic Health Warning Law,” si Masauding ya habla.
Si Masauding ya habla, ya confisca na posesion de Garao diferentes clase de cigarillo que tiene el valor de P1,022,929.60.
Asegun con Masauding, el mga confisca cigarillo y el negociante ya pone bajo’l custodia del policia del municipio de Polanco para el propio disposicion. (B. Garcia)