El mga autoridad ya servi tres orden de aresto contra con un rebelde New People’s Army (NPA) listao como un bien “wanted” persona na carcel del policia na provincia del Misamis Occidental.
Si Police Brigadier General Bowen Joey Masauding, el Director Regional del Policia, ya habla cay el tres orden de aresto ya servi contra con Matias Gaquit que tiene el mga palayao de Apyot, Opong, y Perno.
Si Masauding ya habla el mga orden de aresto ya servi el mga pulis bajo su mando y del provincial del Misamis Occidental contra con Gaquit na carcel del policia na ciudad de Tangub mga alas 5:20 del Jueves tarde.
Asegun con Masauding, tiene premio de P4.8 millon para el aresto de Gaquit base na orden que ya dale el Departamento de Defensa Nacional y Departamento de Interior y Gobierno Local.
Si Masauding ya habla el mga orden de aresto que ya servi contra con Gaquit amo el mga siguientes: dos orden de aresto por el crimen de matansa sin piansa; un orden de aresto para el crimen de asesinato frustrado con P200,000 piansa; y orden de aresto para el crimen de rebellion con piansa de P40,000.
Todo el tres orden de aresto contra con Gaquit ya dale el un tribunal na municipio de Sindangan provincia del Zamboanga del Norte.
Asegun con Masauding, si Gaquit alegaomente envuelto na mga atrocidad que ya comete el mga rebelde NPA na Zamboanga Peninsula y Region 10.
(B. Garcia)
