Tres personas el ya iri despues que ya cae de ila vehiculo na canto’y rio na uno del mga barrio aqui na ciudad de Zamboanga, asegun con el policia local del Domingo.
Asegun con el Zamboanga City Police Station 7 (ZCPS7) el accidente ya ocuri mga alas 6 del Sabado denoche na Sitio Corote, Barangay San Roque, en este ciudad.
Con el mga victima ya conose como si Arminda Francisco, 43 años el chufer del vehiculo, y su dos pasajeros nombrao como canda Jovan Francisco, 43, y Frederico Sacro, 32, todo mga residentes del Paseo de Palmeras, Barangay Cabatangan, en este ciudad.
Base na investigacion, el vehiculo que ta maneja ya cae na canto’y rio despues ya man vuelta y man atras si Arminda mientras ta maneja le na pa subida parte del “bypass road”.
El accidente ya causa destroso con el vehiculo mientras ya iri si Arminda y su dos pasajeros.
Con Arminda y su dos pasajeros ya lleva na hospital para el curada medical. (B. Garcia)