El mga autoridad ya aresta tres high-value individuals (HVIs) suspechao y ya confisca valor de P544,000 droga ilegal na un campaña contra droga na provincia del Sur Cotabato, asegun con el Area Police Command-Western Mindanao (APC-WM) del Martes.
El APC-WM ya identifica lang con el tres arestao HVI suspechao por medio del de ila mga palayao como el mga siguinetes: Moroy, 31 años el edad; Bok-Bok, 36; y, si Pedong, 24.
Asegun con el APC-WM, con el tres HVI suspechao ya aresta na un operacion de compra busto del Viernes na Sitio Supon, Barangay San Jose, ciudad de Koronadal, na Sur Cotabato.
El policia ya habla, ya recubri durante el operacion de compra busto 80 gramos de suspechao shabu enpaquetao na sinco sobrecitos plastico con el valor de P544,000, y dinero de compra busto.
Con el tres arestao HVI suspechao ya pone bajo’l custodia del policia na ciudad de Koronadal en preparacion para el plantada del formal asunto contra canila por violacion del Comprehensive Dangerous Drugs Act of 2002. (B. Garcia)