Uno del mga personas mas buscada na provincia del Zamboanga del Sur el ya captura mga autoridad siguiendo el un tirahan na provincia del Zamboanga Sibugay, asegun con el policia del Martes.
Si Police Brigadier General Bowenn Joey Masauding, el director del mando regional del policia o Police Regional Office-9 (PRO-9), ya identifica con el capturao acusao como si Felipe Bajolo, quien listao como el numero 10 persona mas buscada na provincia del Zamboanga del Sur.
Asegun con Masauding, con Bajolo ya captura durante un operacion de aplicacion de ley por medio de servi’r orden de aresto mga alas 12:45 del Domingo denoche na Purok Bombil, Sitio Sacaon, Barangay Guinoman, Diplahan, Zamboanga Sibugay.
Asegun con Masauding, si Bajolo ya iri na su esquierda pierna cuando el mga operativas ya man balus despues que ya tira le canila cuando ya gole ele ya llega el mga autoridad para servi orden de aresto contra conele.
Si Masauding ya habla, si Bajolo tiene pendiente orden de aresto por el crimen del matansa sin recomendao piansa que ya dale el un corte na ciudad de Pagadian na provincia del Zamboanga del Sur del Mayo 12, 2010.
Ya recubri na posesion de Bajolo un .9-milimetro pistola con cuatro bala; un improvisado shotgun con clip de cuatro bala; un funda de cuero; y un granada de fusil.
Con Bajolo y el mga confiscao materiales ta esta ahora bajo’l custodia del policia na municpio del Diplahan na provincia del Zamboanga Sibugay para el propio disposicion.
Si Masauding ya comenda con el combinao operativas del policia y militar por el exitoso aresto de Bajolo, quien ta esconde por mas de 10 años. (B. Garcia)