El Guardia Costera del Pilipinas o el PCG ya consolida con de ila dos mando para optimiza el recursos y mando y control del dominio maritima na mar de Sulu y Celebes del pais.
Ese ya vene despues que el PCG, na un movimiento sin precedente, ya instola con Commodore Marco Antonio Gines, como el comandante del Coast Guard District-Bangsamoro Autonomous Region in Muslim Mindanao (CGD-BARMM).
Si Gines designao como el concurrente comandante del Coast Goard District Southwestern Mindanao (CGDSWM) base na ciudad de Zamboanga.
Si Admiral Ronnie Gil Gavan, el comandante del PCG, ya encabesa con el rito del cambio del mando del Jueves na quartel nacional del PCG na pantalan del ciudad de Manila.
Asegun con el CGDSWM, si Gines ya releva con Capitan Christopher Auro, con quien ya designa como el comandante del CGD Northeastern Mindanao.
“El consolidacion del mando de BARMM y Zamboanga Peninsula amo un estrategico movimiento para optimiza el recursos del mando y control na dominio maritima na mar de Sulu y Celebes,” el CGDSWM ya habla na un anuncio.
El CGD-BARMM, que ya activa del Deciembre 14, 2020, tiene el jurisdiccion na mga lugar del Maguindanao del Norte, Maguindanao del Sur, Lanao Del Sur, Basilan (puera con el ciudad de Isabela), Sulu y Tawi-Tawi
El CGD-BARMM, que tiene bajo mando siete estaciones y sub-estaciones, amo el aka-15 Coast Guard District na pais y el aka-seis Coast Guard District na Mindanao.
El quartel del CDG-BARMM locao na Polloc Freeport and Ecozone na municipio del Parang, Maguindanao del Norte.
El CGDSWM tiene el jurisdiccion na mga lugar na Zamboanga Peninsula, parte del BARMM and parte del Region 12.
El CGDSWM tiene bajo mando nueve estaciones y 31 sub-estaciones. (B. Garcia)