El Joint Task Group (JTG)-Atlas del Joint Task Force (JTF)-Poseidon ya activa dos unidades para reforza con el seguridad maritime y defensa territorial na sur parte del Filipinas, asegun con el militar del Domingo.
Si Brigadier General Nestor Narag, el comandante del 2nd Marine Brigade (2MBde), ya habla el dos unidades que ya activa na un ceremonia amo el Task Unit-Maritime Security y Task Unit-Amphibious.
El ceremonia de activacion ya conduci del Viernes na Marine Barracks Domingo Deluana que ta servi como el casa del quartel del 2MBde na Barangay Sanga-Sanga, Bongao, Tawi-Tawi.
Asegun con Narag, el Task Unit-Maritime Security, compuesto del Marine Battalion Landing Team-4 (MBLT-4), que altamente capacitado na operaciones de seguridad maritima, despues que ya esta bajo el especializao recapacitacion na quartel del Philippine Marine Corps antes el designacion del batallon na provincia del Tawi-Tawi.
Si Narag ya habla, el Task Unit-Amphibious compuesto del MBLT-12, que designao na provincia del Tawi-Tawi desde’l año 2021.
Asegun con Narag, el dos unidades hay servi como el primaria brazo operativo na dominio maritima y estrategico vias de comunicacion maritimas para salvaguarda con el borde y aguas territorial na Sur-weste parte del pais. (B. Garcia)