Dos myembros del Moro Islamic Liberation Front (MILF) quien alegaomente envuelto na un emoboscada (ambush) na Basilan el ya rindi con mga otoridad na mencionao provincia.
El 101st Infantry Brigade na un declaracion del Huwebes ya nombra con el dos suspechao quien ya rindi como canda Adzmin Manjapal, 20, y si Mudzni Sapau, 27 años el edad, ambos mga residentes del Barangay Ulitan, Ungkaya Pukan, Basilan.
Canda Manjapal y Sapau ya rindi con Brigadier General Alvin Luzon, comandante del 101st Infantry Brigade del Martes na quartel del mencionao mando na Barangay Tabiawan ciudad de Isabela, provincia de Basilan.
Asegun con Luzon cay canda Manjapal y Sapau envuelto na emboscada del tropa del 64th Infantry Battalion (IB), mga myembros del Joint Peace and Security Team (JPST) y Vice Alcalde Ahmadin Barahim del Municipio del Ungkaya Pukan del Agosto 12.
El emboscada que ya susede na Barangay Ulitan, Ungkaya Pukan, ya resulta na muerte del un soldao y un pulis.
Durante el incidente, el grupo de Baharim ta conduci inspeccion na Barangay Ulitan en preparacion para el conducida de un “community outreach program” na dia de Biyernes, Agosto 18.
Asegun con Luzon cay el rindida de canda Manjapal y Sapau ya facilita mga lideres del MILF na provincia de Basilan.
Si Luzon ya habla cay maniobra del mga tropa del Joint Task Force Basilan compuesto del 64IB y 5th Special Forces Battalion encontra con el 114th based command del MILF, particularmente na grupo de Huram Malangka na Barangay Ulitan, Ungkaya Pukan, ya resulta na rindida de canda Manjapal y Sapau.
Si Luzon con optimismo na prospecto del proceso de paz siguiendo el rindida del dos suspechao na incidente de emboscada.
(B. Garcia)
(Photo credits to the owner)