Dos rebelde New People’s Army (NPA) el ya muri mientras un soldao el ya iri na un tirahan durante un operacion de aplicacion de ley na T’boli, Sur Cotabato, asegun con el militar del Viernes.
El 6th Infantry Division (ID) ya nombra con el dos muerto rebelde como canda Yasser Catacutan y si Eizar Emam.
Nohay nombra el militar con el irido soldao quien un miembro de 5th Special Forces Battalion.
Asegun con el 6ID, el tirahan ya ocuri del Lunes madrogada na Barangay Talcon, T’boli, Sur Cotabato.
El 6ID ya habla, ya socede el tirahan cuando ya inbisti el dos rebelde NPA con el mga soldao y pulis quien hay servi era un orden de aresto contra con Catacutan, quien ta enfrenta asunto criminal de matansa na corte.
Asegun con el 6ID, con el dos rebelde ya encontra tumbao despues de 10 minutos tirahan.
El mga soldao ya lleba con Catucutan y Emam y un irido soldao na hospital pero ya declara muerto el doctor con el dos rebelde apenas ya llega na hospital.
El irido soldao ta esta bajo’l curada medical na hospital, asegun con el 6 ID.
El mga soldao ya recubri na posesion del dos muerto rebelde un calibre .45 pistol, un contenedor plastic que ta contene bateria y material de explosive. (B. Garcia)