Un persona clasificao como un street level individual (SLI) y de quien nombre incluido na lista de vigilancia el ya aresta y valor de P8.1 millon droga ilegal el ya confisca mga autoridad na un campaña contra droga aqui na ciudad, asegun con el policia del Viernes.
El policia local ya nombra con el arestao SLI suspechao como si Jul-Akmad Eling, 36 años el edad y residente de Upper HB Home, Barangay Sinunuc, en este ciudad.
Asegun con el policia, con Eling ya aresta na un operacion de compra busto mga alas 12:48 del Viernes aga na Barangay Sinunuc, en este ciudad.
El mga operativas ya recubri na posesion de Eling un kilo y 200 grams de suspechao shabu que tiene el valor de P8,160,000, un bolso bandolera, un balutan de 59 pedaso de P1,000 dinero falso que ya pone insima un real P1,000 markao dinero.
Con Eling ya detene na quartel del Zamboanga City Police Office en preparacion para el plantada del asunto contra conele por violacion del Ley Integral de Drogas Peligrosas de 2002. (B. Garcia)