Dos peleao familias ya reconcilia por medio de un amistoso resolucion que ya facilita el 45th Infantry Battalion que ta encabesa si Tiniente Coronel Michael Colanta y mga oficiales de barrio y municipio na provincia de Basilan.
Asegun con el 101st Infantry Brigade, el formal resolucion ya hace na “covered court” del municipio de Tipo-Tipo, Basilan del Domingo.
El 101st Infantry Brigade nohay mas nombra con el mga familias envuelto na pelea quien mga residentes de Barangay Ulitan, Ungkaya Pukan y Barangay Guinanta, Al-Barka.
Durante el resolucion, todo miembros del dos familias el ya somete de ila cuerpo na formal ceremonia de ‘paz y reconciliacion’ firmando con el documento del amistoso resolucion.
Ya sella tamen sila de ila obligacion con la mano y abrazando para dale mira sinceridad na de ila acuerdo.
El de ila playto ya principia por causa na un asunto de abuso carnal que ya ocuri na Barangay Poblacion, Tipo-Tipo del Noviembre año 2023.
El incidente ya resulta na matansa del suspechao quien in residente de Barangay Guinanta, Al-Barka.
El desgraciado incidentes ya causa na mga incidente de violencia entre el familia del victima y del suspechao por causa na mga especulaciones.
Na su mensaje, si Brigadier General Alvin Luzon, el comandante del 101st Infantry Brigade, ya comenda con el esfuerzos del mga oficiales de gobierno del municipios de Ungkaya Pukan, Tipo-Tipo y Al-Barka quien incesante ya persegui busca resolucion de paz con el mga conflicto interno na de ila municipalidad. (B. Garcia)