Siete suspechao, incluido un director de escuela, el ya aresta mientras dos cuartos de droga ilegal el ya bungca na Bangsamoro Autonomous Region in Muslim Mindanao (BARMM) y na Zamboanga Peninsula, asegun con el Philippine Drug Enforcement Agency (PDEA) del Lunes.
El PDEA ya nombra con el mga suspechao ya aresta na BARMM como canda Wajid Galib, 63 años el edad, director de un escuela y ta mantene con el cuarto de droga, John Lloyed Compaña, y si Ridzwan Ismael Abdulgani, 25.
Asegun con Gil Cesario Castro, el director del PDEA-BARMM, con el tres suspechao ya aresta cuando ya servi sila orden de aresto contra con Compaña del Sabado na Purok Kadtatabanga, Barangay Rosary Heights 7, ciudad de Cotabato.
Asegun con Castro, con el tres suspechao ya cogi na acto ta usa droga ilegal cuando ya servi sila el orden de aresto contra con Compaña que ya resulta tamen na bungcada del cuarto de droga.
Si Castro ya habla, el mga operativas ya puede recubri na cuarto de droga mas or menos sinco gramos de suspechao shabu enpaquetao na 11 sobrecitos que tiene el valor de P34,000 y varios parafernales de droga ilegal.
Asegun con Castro, ya aresta ya con Compaña del año 2020 por causa de un ofensa relatao na droga ilegal.
Si Castro ya habla, con el tres arestao suspechao temporariamente ya detene na carcel del PDEA-BARMM en preparacion para el plantada del asunto contra canila por violacion del “Comprehensive Dangerous Drugs Act of 2002”.
Asegun con Castro, con el mga suspechao ya aresta el mga operativas del “Bangsamoro government’s Internal Security Service”, Oficina del Senior Minister, y “Ministry of the Interior and Local Government”, hunto con el mga miembros del “Bangsamoro Anti-Illegal Drug Task Group”.
Mientras tanto, Si Maharani Gadaoni-Tosoc, el director del PDEA na Zamboanga Peninsula, ya nombra con el arestao mantenedor del cuarto de droga como si Jordan Andao, 29 años el edad, y un mecanico.
Asegun con Gadaoni-Tosoc, con Andao ya aresta na un “buy-bust operation” que ya resulta na bungcada del cuarto de droga ilegal mga alas 10:30 del Sabado aga na Purok Talaba, Barangay Camanga, Dumalinao, Zamboanga del Sur.
Si Gadaoni-Tosoc ya habla, con Andao ya aresta hunto con tres visitas del cuarto de droga ilegal. Nohay mas nombra si quien el tres arestao visita de Andao.
Asegun con Gadaoni-Tosoc ya puede recubri mas o menos sinco gramos de suspechao shabu que tiene el valor de P34,000, mga celpon, portamoneda, diferente parafenales de droga ilegal y markao compra busto dinero.
Si Gadaoni-Tosoc ya habla, ay planta asunto contra con Andao y su tres visita por violacion del Comprehensive Dangers Drugs Act of 2002. (B. Garcia)