Dos myembros del grupo Abu Sayyaf ya rindi cay ta deseya sila vivi un pacifico vida hunto con el de ila cada’y cual familya amediante del ofensiva del fuersa military contra canila ambos na provincia del Basilan y Sulu.
El militar ya nombra con el dos Abu Sayyaf que ya rindi como canda Totoh Akalun, treynta’y tres anios y mymebro del grupo Abu Sayyaf na Basilan y si Abu Junjun, veinte nueve anios el edad, y sigidores del grupo Abu Sayyaf na Sulu.
Asegun con Brigadier General Domingo Gobway, comandante del Joint Task Force (JTF)-Basilan, cay si Akalun ya rindi del Lunes con Tiniente Coronel John Ferdinand Lazo, comandante del 64th Infantry Battalion na Barangay Tumahubong, Sumisip, Basilan.
Si Gobway ya habla cay si Akalun, un residente del Barangay Upper Benembengan, Sumisip, un sigidores de Pasil Bayali, el lider del Abu Sayyaf na Basilan.
El rindida de Akalun ya atribuji con el sustenido ofensiva del military y suporta del pulisya y tambien del govierno municipal del Sumisip.
Si Abu Junjun ya rindi y ya entrega un M-79 grenade launcher del domingo con el maga soldao de 20th Special Forces Company na Patikul, Sulu.
Si Junjun un sigidores del grupo de Morasil Mudjahirin, un Abu Sayyaf sub-leader, quien bajo el liderato del defunto lider Hatib Hajan Sawadjaan.
Asegun con Major General Ignatius Patrimonio, comandante del Joint Task Force-Sulu, cay si Junjun ya rindi por medio del esfuerso del maga oficiales del Barangay Bakung, Kadday Mampallam, y Kaunayan na municipio na Patikul, y del maga personajes del 20th Special Forces Company quien bajo del 6th Special Forces Battalion que ta encabesa si Tiniente Coronel Harold Nemeño.
Asegun con Patrimonio cay el conducta del Mass Base Operations del 20th Special Forces Company ya contribuji tamen na rindida de Junjun. (Bong Garcia, Jr., photo courtesy of Joint Task Force Sulu)