Dos pulis el ya muri y cuatro el ya iri na tirahan contra con mga suspecho miembros de sindicato de droga ilegal na provincia del Maguindanao del Norte, asegun con el policia del Sabado.
Si Police Brigadier General Romeo Macapaz, el director del Police Regional Office-Bangsamoro Autonomous Region (PRO-BAR), ya habla el tirahan ya ocuri mga alas 11:40 del Viernes aga na Barangay Simuay, Sultan Kudarat, Maguindanao del Norte.
Si Macapaz ya identifica con el dos pulis ya muri durante el tirahan como canda Police Corporal Kirt Sipin y Patrolwoman Roselyn Bulias.
Asegun con Macapaz, dos del cuatro irido amo mga miembros del policia quien admitido na hospital para el tratamiento medical.
Si Macapaz ya habla, dos del mga suspechao quien ya iri durante el tirahan ya puede captura el mga operativas del policia.
Asegun con Macapaz, el otro dos suspechao ya puede escapa y objeto del operacion de enbuscada ta conduci el policia.
Si Macapaz ya habla, el mga suspechao ya precura escapa que ya resulta na tirahan cuando ya realiza sila cay ta hace sila transaccion con mga operativas de gobierno.
Asegun con Macapaz, el objeto del operacion amo mga miembros de sindicato envuelto na distribucion de droga ilegal na Maguindanao del Norte y na mga sercanos lugar.
El mga operativas ya confisca un kilo de suspechao shabu que tiene el valor de P6.8 millones, un calibre .45 pistola con mga bala, 10 balutan de fotocopiadora P1,000 que ya pone insima un real P1,000 que ya usa como dinero de compra busto.
Asegun con Macapaz, ta continua de ila esfuerzo para busca con el dos suspechao quien ya puede escapa durante el tirahan. (B. Garcia)